أنْفض جناحي وأنْثرْ لولوِ الَمعْنَى
وإذا أمِدْ الجناح إخْتَلْ وِزنْ الكَون
وآردْ أضِمَّهْ واحِسْ اللَّيْل يتأنَّى
خَلِّكْ عَلى دوب دوبك يا غريب اللَّون
واعيْد نَظْمي واصِب حْروفْ تِتْغَنَّى
واهْدي المسامِعْ كلامْ من الذَّهَب موزون
تِتْبَعني الشَّمْس تَظْْهر خَدَّها وَسْنَا
وْيَتْعِبني البَدْر وآنَا المولَهْ الَمفْتون
أحيا بقربك وآسِج بْغيبتكْ وافْنَى
وآرد واحْيا إذا لي ترجعين ظْنون
والناسْ حاروا بعقلي كيفْ ما جَنَّا
ومنْ سحر فَنِّكْ يقولون الجنون فْنون
قلبٍ معَذَّبْ بحبِّك صعبْ يتْهَنَّا
عايشْ حياتي على أعْصابي وْبِكْ مَسْكون
يا كثْر ما كنتْ أتْعَنَّى وأتْمَنَّى
شوفكْ ولا شيْ رَحْمه ولا يجيني عون
ما شِفْت أجْمَلْ ولا أكْمَلْ ولا أسْنى
مِنْ وَصْف زَيْنِكْ بطول ولا ملاحَةْ لون
جمعتي الوَرْد في الأوجانْ يتْجَنَّى
واهديتي الشّوكْ لِلْمَجْروح والَمطْعون
في ريْقِكْ الشَّهْد والسَّلْوى مَعْ الَمنَّا
واللّي وَعَدْني أذوقهْ قِلْت له مَمْنون
وْمن شَمْ عِطْرِكْ جِفَاهُ الهَمْ والحِزْنا
عِطْرِكْ دوا كلْ قَلْب مْن الجفا مَحْزون
مِنْ وقتْ حِوَّا وْلين اليومْ ما اظنَّا
وحْده على مثل زَيْنِكْ يا مَهَاةْ الكون
حِسْنِكْ له النَّاس مِ البلدانْ تِتْعَنَّى
خِطَّارْ زوَّارْ صوبكْ وِدِّهم يسعون
وانا القريبْ الغريب الأبْعَدْ الأدْنَى
قلبي بْيدَيْنِكْ مِنْ أشواقْ وْعَنَا مَرْهون
لي حَسْ بالوَقْت وَقْتِهْ صَفَّقْ وْغَنَّى
لكنْ ماشيْ في الدِّنْيا ترى مَضْمون