صفح صافي الخدّ المصفى عن الصفا
وصفا ما صفا ممّا صفا غير لنصافي
صفاني وصافاني ولكن ما صفا
وفيٍّ معي لكنّ ما يوفي الوافي
بغيت الوفا لكن حبلي من الوفا
تقصّر وريده منهل المنبع الصّافي
وطيت الحفا وامشي على حافي الحفا
مصاهيرها وامشي عليها وانا حافي
لمست الجوى في خافي الرّوح والتوى
جحيم يشبّ ابخافي الخافق الخافي
يا تلّ قلبي تلّ حرّ من العلا
تنحّى وسبّق شارد الجول متقافي
وعزّي لروح عسّها عاسف الهوى
عسيف يعسّفها معا سيف عسّافي
تواقد لظاها شبّها موقد الغضا
نسيما تزاغيها نسانيس هفافي
عسفها على غير الهوى عاسف النّوى
وكلفها على صوع المكاليف كلاّفي
ألا يا شفا نفس مشفّاه للشّفا
تشافى شفاها منك وانته شفا الشّافي
ألا يا غزال يرتعي فايع الخلا
ربيب المهالي يرتعن برّ لطرافي
دماينة متقاقف عن شمّة الهوى
لفحها الذعير وحاوزت صوب لكشافي
مصافيف عقد صفّ من لؤلؤ الصّفا
جواهر منقّاية كما صفوة الصّافي
كم قانص للصّيد في قانص الخلا
تعذر عليه الصّيد لو كان تقّافي
شكيّه لكم (يا دايم السّيف) في النّيا
لزيم وفي كلّ المعاريف عرّافي
شقاي الونين وحالتي بالشّقا لوى
غزير الجروح بشقّها ما رفا الرّافي