صوب دار الخلّ انويت السفر
القلب مشتاق واحثّ المسير
بتبعه لو في مهاليك الخطر
والسبب ما بي من الشّوق المثير
هام قلبي في هواكم وانجبر
صدّقوني كيف أسلا ما يصير
يا حبيبي من مصابي في خطر
وارحم اللّي صار في حبّك أسير
ما هوى قلبي بعد غيرك بشر
لك حلفت ابربّي العالي الكبير
لا تعذّبني وترويني القهر
ارحم إلحبّك محبٍّ يستجير
انت عندي مثل روحي والنظر
منك عوقي وانت بحوالي خبير
لو بغيت أيّام عمري والدّهر
في ودادك أنت مالي حدّ غير
كلما هبّت نسانيس الفجر
جاب لي الذكرى على جنح الاثير
ما يطاوعني ولا عندي أمر
قلبي الماخوذ ما يقبل شوير
الصبر يازين سمّ ذوق مر
والهوى تلاّف للعاشق خطير
شوف حالي من تصاويب القدر
بن خليفه ثيبني وانته خبير