ياخذ عيوني لاجل منها يشوفك

هل كيف بعت اللي بروحه يداريك
وانته مريح البال ليلك ويومك؟
ذاهل منامك صيحته ما توعّيك؟
شخصٍ على حبّه إيبين امعلومك
تقطع رجا من كان بالحبّ يرجيك
يرجيك وانته غاية العمر دومك
يدرى الهوى وبغالي الرّوح يفديك
ما تخاف ربّك في صلاتك وصومك؟
إلى متى يا مهجتي في تناسيك؟
سابق هواك وشارعات أولومك
ارحم شجيٍّ طايحٍ في بلاويك
يا بعد عمري ما ضميرك يلومك؟
أونّ لي مرّوا بتذكار طاريك
واصغي سموعٍ لاجل تيني علومك
ليت العذول إيكفّ عذلٍ عذل فيك
ياخذ عيوني لاجل منها يشوفك