يا خاليين البال حالي ترى حال
بي ليعة مكتومة في فوادي
وعندي من اشواقي تباريح وامال
منها جواري عبرتي في ازدياد
في ليلتي وجه القمر بات باقبال
كنه يذكرني بغاية مرادي
حلوه عليها سال م العين ما سال
ذكرى لها دايم شرابي وزادي
عنها أنا ما اسمع مقالات عذّال
طالب رضاها صادق في ودادي
ولا نفعني في الهوى قول من قال
منه النصيحه مثل نفخ الرماد
ولو أنني باصبر ولو كنت باحتال
ما تنفع الحيله ولا الصبر فاد
ما لي دوا من علة الشوق قتال
أبات ليلي ما أذوق الرقاد
كنه في قلبي من ضنا الحب زلزال
متجدد الحسره طويل السهاد
باشكي غرامي والهيام الذي طال
وليعات وجدي دايمه ما تزاد
لولا العناد وعزة النفس بانال
عطشان واهجر موردي من عنادي
والحب جنه كلها خوف واهوال
وما تقهر الحب القلوب الشداد
ولا جنود وكم دهى الحب الابطال
عايا بفرسان تذل المعادي
يا ناظمين الشعر طارت بي أحوال
صوب الذي حل وسكن في الفواد
شفت بغرامه لى يقرب بالآجال
وابليت في حبه ثياب جداد
واللي يواسيني يجاوب وفي الحال
جواب شافي قاطع بالوكاد
ألغاز الطيور:
_________________________
سألت عن طير وله اسم رجال
وبلا جناح يطير رايح وغادي
واذا يغني م الفرح جر موال
حتى ولو هو في القفص ذاك عادي
وعن طير دوم يطير في لونه أشكال
ما ينقبض أو ينشبك أو يصاد
وعن طير عاينته مربَّط بالحبال
محبوب دوم وينحمل بالأيادي
وعن طير لى مضروب للناس بامثال
في آية مذكورة للعباد
وعن طير زاهي لون في الناس يختال
وصف المهاد وناعمين المهاد
وعن طير ما به ريش موصوف لا زال
مثبت جناحه لحاضر وبادي
وعن طير اسود لى مع الوقت رحال
بينه وبين البين لون السواد
وعن الجبال الطايره وشبه الجبال
ف بحر وسما تنفع عباد وبلاد
وعن الحمامه إن دهى خوف واوجال
طارت وهي مع خوفها في جلاد
اللغز:
__________________________
حكَّم زماني والدهر دوم عيّال
والزم عليّه بالوفا والسداد
ودبَّر مودِّي عقب ما زاد الاحمال
على الفواد اللى لطيفه ينادي
كني من أحكام الليالي بمدهال
أسد درب السيل والسيل بادي
يظنني الغافل مريحٍ بمنزال
ما فيه غير الإنس رايح وغادي
ما يدري أني أحمل هموم ثقال
واجالد الدنيا طويل الجلاد
بين الفراق وبين ساعات الوصال
نفس حداها من عنا البعد حادي
خليتها في اللغز مخرج ومدخال
واركضت في الحلبه خيار الجياد
ولغزي لمن فاهم وللغز حلال
بيني وبينه دوم عِسم الايادي
له م السما إن غيَّم الجو منزال
شبه الحيا بالف إذا الحظ زاد
إن كان قدامك تلاقيه بآمال
واذا وراك اصبر ليوم المعاد
يا كم ظهر م الغيم والغيم همال
عليه تتولّه قلوب العباد
لمع البروق ومشبه البرق شعّال
واذا نزل رب البريّات هادي
بين السهم والقوس ما كل نبال
يصيب لو أنك تظنه مجادي
لغز تفرع مثلما الغصن ميّال
والأصل واحد للفروع البعاد
يا اهل الشعر هذي جديدات الاقوال
والله يوفقكم لدرب الرشاد