هاض الخيال وهاجسي ينتحي بي
واعرج خيالي فوق متن السحابي
بين الكواكب والفضا والمغيبي
دخلت في جوِّ هدوّه هدابي
على صفا خدِّ صفوّه صفي بي
برقِ سرى بي في الغرام وغدا بي
هواه مثل العقربي يلتوي بي
ورعود شوقي تيّهت لي صوابي
داجِ على شمٍّ وخصرِ سليبي
وردِ عليه امنكّسات الحرابي
اسهوم صرفِ من لحظهن عطيبي
منهن تصدّي والعزم ما قوى بي
ما بين سماّر السهر يختلي بي
واسج في خلوات فكرِ دوى بي
سرى بي هواه سري النجوم المغيبي
وبي ونّةِ منها صداها سرى بي
اذهال عشقِ في خفوقِ عطيبي
منك المحبه والرضا والعتابي
انته هوى قلبي وأنسي وطيبي
وانته منى عمري وفرحة شبابي
يا جنة احلامي خطاها نصيبي
من ليعة الفرقا غدت بي عذابي
شام البروق الكاذبه ما تثيبي
وخلا السّحايب ودقها في انسكابي
هواجسِ تسري بعيد وتغيبي
وتسعى نواصيها على فكر بابي
وما شفت من زين الزّمان الرطيبي
الاّ سرابٍ داخلٍ في سرابي
وانظرت بين الناس عقب اتجريبي
وايلا العرب أصناف كثر الترابي
حدِّ يحب الجود له يستطيبي
وحدِّ شحيح م البخل في عذابي
وحدِّ مبش وله الكدر ما يصيبي
وحدِّ بحزّات الفرح باكتئابي
وجالست منهم من فهيم وأديبي
وجالست أهل العلم واهل الكتابي
لاتامن الدنيا على ما تجيبي
أترى لها ظفرِ ومخلب ونابي
وكن في ذراها مثل شهمِ نجيبي
ياوي إلى فضله ضعاف ونجابي
والعمر كنزِ كل ليله نهيبي
للدهر ياخذ ما عطى باستلاب
وما كل ما يلمع ذهب يا الأريبي
تدري ولا كل القماش الحصابي

الاثنا عشر سؤالاً:
__________________
يا من سمع عن شعرةِ ما تشيبي
مسودّةِ تشبه جناح الغرابي
وعن رامي كل ما رمى ما يخيبي
مهيوب وهوه قاطع ما يهابي
وعن سبعةِ صبيان أمن وحريبي
وعن جاريات مثل خيل العرابي
وعن البحور الزاّخرة بالغبيبي
وما للسفن في عبّها من ذهابي
وعن العلوم الكاذبه ما تعيبي
لو كنت ترويها بغير احتسابي
وعن قاضيِ بالعدل حكمه صويبي
يحكم وحكمه دايمِ في صوابي
وعن واحدِ م الناس شانه غريبي
لا هوه شيخ ولا عزيز الجنابي
الناس تسمع له وله تستجيبي
واطّيع إن يامر عتاة الرّقابي
وعن الصبي اللي أبد ما يشيبي
وعن الزكاه اللي بليّا نصابي
وعن دمع يجري دون عينِ سكيبي
وكم بسببه من فتنةِ واحترابي
وكل سايلِ بالبرد يجمد صليبي
وش سايلِ يجمد بنار التهابي

اللغز:
__________________
واللغز لي سهل وعليه الرّقيبي
شاهده وهو شيِّ تحدّه اسبابي
عن دار حلوه عنّنا ما تغيبي
حسن تبارك مثل حسن الكعابي
مبنايةِ بايدي مداها رحيبي
واللي بناها عارفِ في الحسابي
يا حسن لون النّيل فيها عجيبي
ويا طيب ماها سايغ للشّرابي
بالهول منها والمخيف المريبي
الها محلِّ نايف القدر رابي
سبع العجايب ما يغترن لبيبي
ايعرفها العارف لسبع عجابي
وضحت لاهل الشعر قولٍ مصيبي
للي فهم معنى مقالي وصابي
ويااهل الفكر بالنّظم قول المجيبي
ويا فاهم الألغاز رد الجوابي