تبعك عذاب أو شوفك اعطال
والصبر طال او وصلك اشحيح
ناحل وجسمي كنه اهلال
ويميل من نسمة هوا الّريح
بي من وداده باخص الحال
لاسباب من قلّ التصرّيح
قلبي عويج وصابه اوجال
وغيري عن امّا صابه امريح
كنّ ابحشايه لاظي الصّال
نار الغضا وتهبّه الريح
طوفان حبّك موج شلاّل
ومركب غرامي لوح ويشيح
يلوث وين الغبّه اديال
وين الهوامش والتّماسيح
شفني شرى لي يتبع اللاّل
واللاّل غدرانه منازيح
يا عاذلي شف وصله امحال
مبعد غريب وياخذ الرّيح
مثل الظبي لي خزّ جفال
لي شاف م القانص ملاميح
ريم عليه الوصف ينقال
يرعى قفر صبح المياضيح
يا بن خليفه عنكم انسال
ومن صوبك الشّرتا مطاييح
كلّ انظر في حالي ايسال
ويسال يا للّى قلبه امريح
ما يستوي راحل ونزّال
واللّي شجي وفواده امريح
واثنين ما صاروا علي حال
يضحك وذاك الثّاني ايصيح
حرّ خفق من راس متلال
لغروب فرّوا له تلاويح
يا غرّ يا بو عود ميّال
يا بو خصور لك مكاشيح
شوفك يخوّز ضيقة البال
ويبري جروح اللّي مجاريح
عسى ديارك جود همّال
يروي فيويك والمطاييح
سيح الغريف وروس لجبال
والسّاد ورمال مناويح
في مرتع الخلفات لابهال
إتّم غدرانه ضحاضيح
عمّ الوطن من سيح ورمال
اشهور وايّام مراويح