السِّيرهْ والمِسيرِهْ

إرفَعْ الرَّايِهْ إلىَ أعلىَ مكانْ
وخبِّرْ الدِّنيا وأهَلها منْ نكونْ
وخَلّها تنتشي بسحرْ البِيانْ
رايعاتْ الوَصفْ ببحورْ ووزونْ
وغَنِّ بأشعارٍ يخلِّدها الزِّمانْ
لحنها ماتوصَلْ لمِثلِهْ اللِّحونْ
مطربٍ بدعِهْ مايجري منْ لسانْ
بَدعِ فكرٍ حيَّرْ اللِّي يَبدعونْ
تنتشي بشَلاَّتِهْ الغيدْ الحِسانْ
وإتِّمايلْ منْ طرَب مثلِ الغصونْ
وخبِّرْ الدِّنيا بما كنَّا وكانْ
منْ حضارَهْ بكلْ وصفِ وكلِّ لونْ
عن مفاخر عاليه في كل شان
وعن صروح وعن بساتين وعيون
وسار ركب زايد حاديه الأمان
وحط شعبه كلهم وسط العيون
الرقم واحد لنا في كل آن
في إقتصاد وفي سياسه وفي فنون
وللفضا غازين مرخين العنان
فوق للمريخ كون فوق كون
مرت الخمسين في خير وأمان
وأبشروا بخمسين فيهن تفرحون