كـرتـبـاز

لا تـلـوم الـلـي ربح مـن كـرتـبـاز
وإنتبه دايــم لـمـا إيـــدك تــحــوز
مـا تـروم أن تـلـحـم كسور القزاز
وضربة الشاطر بها الشاطر يفوز
لا يـغــيــر رايـك الــراي الـنـشاز
واحسب حسابك وجهز لي تـعـوز
كـل وقـت لـه إختراعات وجـهـاز
ولـه لـغـه وأفـكار وأرقام ورموز
الإنتهازي دوم طـبـعـه الإنـتـهـاز
م الفـرص لي باقها مسوي غزوز
إنـت يـا الـلي كل همك في الركاز
ضـايـع عمـرك وتكنز في الكنوز
خـل عـنـدك بـالـبـراهـيـن إعتزاز
والخطا والصح ما هي بـالـلـغـوز
ولا يـحـركـك الـطـمـع والإعـتياز
وغـيـر لله لا تــوطـي ولا تـعــوز
وم الحوادث لا يـصيبك للإهتزاز
كـن جـبل ما أحد لأركـانـه يـروز
ومن يحاول من مشاعرك إبتزاز
ساعة إتـشـوفه إتركه وله مـد بوز
وخـلـي لـنـفـسـك مـهابه وإعـتزاز
ولا يـصيبك حزة الـحـزه حــفـوز
الـبـشـر أنـواع كـل واحـد طــراز
خـيـر خـاوه وشر عن ملقاه خـوز
حـد إسـمـــه خـامــل مـا يـوم فـاز
وحـد إســمـــه بـارز كـل الـبـروز
وحد فيـه إمـن الـتـكـبـر خـاز بـاز
عـن طـريـق الحق خايز به نشوز
والـحـسـود عن الـحـسد مايوم ياز
طبـعه من ضلعه وفي قلبه حـزوز
م الـمـقــدر مـا يـفـيد أي إحــتـراز
لو تـعــلــق كــل أنـواع الـحــروز
والـوطـن مـاهــوه بـطرول وغـاز
الـوطن أسمي وأشرف مـا نـحـوز
ولا تــظــن أنــه هــويـه أو جـواز
حـي ساكـن في الضمايـر مايخـوز
لا تـــدور بـــه مــنــافـع وإمتـيـاز
رغم أنك به وفي أرضـه إمـعزوز
خـل عـندك له ولأمـجـاده إنحـيـاز
تحت شمس العز كرسيه إمحجوز
لك ضربت أمثال بوضوح ومجاز
وإنـتـفـع مـنـي ومـن عـلـمي تفوز