يا حسين اللّون ميّاسي

يا حسين اللُّون مّيَّاسي
سَيِّدي يا سَيِّد الْخُوْدِي
ياعجيد أرْيَام لَطْعَاسِي
هوب سَيْحِيّاتْ ولكودي
وِالْعَيانْ الدِّعْج لَنْعاسِي
والْهِدَبْ كَصَفّ لْجِنُودِي
حبّكم في القلب لَسَّاسِي
والجسم ما صار في زُوْدِي
فوق هذا زَادْ وِسْوَاسي
صدّكم يا نَاعِمْ الْعُودي
أشهد الله أنّي مْجَاسِي
وفوق هذا عِنْدي شهودي
لاَ تِّسَمَّعْ كِلْ رَماسِي
واتْرِكْ الواشِينْ لْحِسُوْدِي
كم بِنَيْتوا في الحْشَا سَاسِي
وصار لجْلِكْ مِلْكْ واحْدُودِي
يا هبوب الصِّبحْ نِسْناسِي
لَيْ هِوَاهَا ريِّضْ النُّودي
ذكَّر اللِي بِالْهِوَي نَاسِي
صاحبي بو خِصِرْ مجلودي
لَنّْ حِبِّهْ مالَه قْياسِي
كيف ما يَوْفِي بلْعهُوْدي
مَا دَرَى متْمَلِّلكْ احْسَاسي
لَنّْ حِبِّهْ ما خِذْ الزُّودِي
مَا صِطَاليْ غَيْرِكُمْ ناسِي
إنْتْ في رُوْيَايْ مَعْدُودِي
جَوْهَر المرجان والْمَاسِي
زاهِيٍ من دون لِعْقُوْدِي
يا بَدِرْ على العين والراَّسِي
عَشِرْ فوق الخْمْس مَعْدُودِي
دَقّ قلبي دَقّْ لْجرَاسِي
لَيْ عليه الطَّالِبْ ايْعُودِي
مِحملي في بَحْرِكُمْ رَاسِي
واسْمِكُمْ شَامِخْ ومَفْنُوْدِي
يا شِذا من كِلْ لَجْناسِي
مِثِلْ طِيْب العِطِرْ والْعُوْدِي
وَرْد وامفتّح بِلَجْنَاسِي
لو يِطُولْ ويَزْمِن إيُّودِي
كِلْ مِنْ ازْمَنْ طَابْ نُوْمَاسِي
هُوبْ مِ لْعَادِي وْمَزْيُودِي